აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, აფხაზეთის ჯანმრთელობისა და სოციალური დაცვის მინისტრ ბესიკ კუსიდისთან ერთად, სამეგრელო-ზემო სვანეთის რეგიონში იმყოფებოდა, სადაც სამედიცინო ცენტრ „დიომედის“ ხობისა და სენაკის ფილიალები დაათვალიერა.
მთავრობის თავმჯდომარემ კლინიკების ინფრასტრუქტურას გაეცნო, სამედიცინო პერსონალს შეხვდა და დაწესებულების ხელმძღვანელებისგან პოლიკლინიკებში აღჭურვილობის გაუმჯობესებისა და ბენეფიციარებზე მორგებული სერვისების დანერგვის მიმართულებით არსებული საჭიროებების შესახებ ინფორმაცია მოისმინა.
„ჩვენი მთავრობისთვის პრინციპულად მნიშვნელოვანია, რომ აფხაზეთიდან დევნილებს ჰქონდეთ ისეთივე სრულყოფილი და ხარისხიანი სამედიცინო მომსახურების მიღების შესაძლებლობა, როგორც ყველა სხვა მოქალაქეს. სწორედ ამიტომ, აქტიურად ვმუშაობთ პოლიკლინიკების ინფრასტრუქტურის განახლებაზე, მედპერსონალის კვალიფიკაციის ამაღლებასა და თანამედროვე ტექნოლოგიების დანერგვაზე“, - განაცხადა გიორგი ჯინჭარაძემ.
მთელი ქვეყნის მასშტაბით, სამეგრელო-ზემო სვანეთისა და იმერეთის რეგიონებში, ასევე თბილისში აფხაზეთის ჯანმრთელობისა და სოციალური დაცვის სამინისტროს დაქვემდებარებაში არსებული „დიომედის“ სამედიცინო ცენტრის 11 ფილიალი ფუნქციონირებს, სადაც არსებული მატერიალურ-ტექნიკური ბაზის გაუმჯობესება მიმდინარეობს და უახლოეს მომავალში აფხაზეთიდან დევნილ ბენეფიციარებს საშუალება მიეცემათ პოლიკლინიკებში თანამედროვე სტანდარტების შესაბამისი სრულფასოვანი სამედიცინო მომსახურება მიიღონ.
აფხაზეთის მთავრობაში აფხაზეთის ავტონომიური რესპუბლიკის მთავრობის წევრებისა და უმაღლესი საბჭოს დეპუტატების მონაწილეობით სამუშაო შეხვედრა გაიმართა.
მთავრობის თავმჯდომარემ უმაღლესი საბჭოს თავმჯდომარე ჯემალ გამახარიას და დეპუტატებს სამინისტროების საქმიანობის ძირითადი პრიორიტეტები და მათი კომპეტენციის ფარგლებში მიმდინარე წელს განსახორციელებელი ინიციატივები გააცნო. მისი თქმით, სამინისტროს ხელმძღვანელები ასევე პასუხისმგებლები იქნებიან პროგრამების ეფექტიან შესრულებასა და საზოგადოებასთან მათი შედეგების ღია და გამჭვირვალე კომუნიკაციაზე.
გიორგი ჯინჭარაძის განცხადებით, მინისტრთა კაბინეტის განახლებული შემადგენლობა გამოცდილი კადრებით დაკომპლექტდა, რაც მნიშვნელოვანი წინაპირობა იქნება დევნილთა საჭიროებების უკეთ და სწრაფად დაკმაყოფილების, სოციალურ-ეკონომიკური პროექტების ეფექტიანად განხორციელებისა და ოკუპირებულ აფხაზეთის რეგიონთან დაკავშირებულ საკითხებზე დროული რეაგირებისთვის.
დეპუტატებმა სამინისტროების გეგმებთან დაკავშირებით მთავრობის თავმჯდომარესა და მინისტრთა კაბინეტის წევრებს კითხვები დაუსვეს და უმაღლესი საბჭოს მხრიდან დევნილთა მიმართულებით არსებული ინიციატივების მხარდაჭერისთვის სრული მზადყოფნა გამოთქვეს.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე დევნილი მოქალაქეების საჭიროებების გაცნობის მიზნით, მათთან შეხვედრებს აგრძელებს.
მთავრობის აპარატში მორიგი შეხვედრა გამართა, სადაც აფხაზეთიდან იძულებით გადაადგილებულმა პირებმა აფხაზეთის მთავრობის ხელმძღვანელს ყველაზე მწვავე და მტკივნეული პრობლემური საკითხები პირადად გააცნეს.
გიორგი ჯინჭარაძე მოქალაქეებს, აფხაზეთის მთავრობის კომპეტენციის ფარგლებში, ყველა საკითხის მაქსიმალურად დროულ შესწავლასა და მათზე ეფექტურ რეაგირებას დაჰპირდა.
აფხაზეთიდან დევნილი მოქალაქეების საჭიროებების გაცნობის მიზნით მთავრობის თავმჯდომარესთან შეხვედრები ყოველთვიურად იმართება.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე საქართველოს განათლების, მეცნიერებისა და ახალგაზრდობის მინისტრ გივი მიქანაძესთან ერთად ბაკურიანის საზაფხულო ბანაკის დახურვის ღონისძიებას დაესწრო და აფხაზეთიდან დევნილ მოზარდებს შეხვდა.
მთავრობის თავმჯდომარემ ბანაკის მონაწილეებს სიტყვით მიმართა და ქვეყნის ტერიტორიული მთლიანობის აღდგენის საქმეში ახალგაზრდების განსაკუთრებულ როლზე ისაუბრა.
„აფხაზეთის მთავრობა მუდმივად ზრუნავს დევნილი ახალგაზრდების განვითარებაზე და აქტიურად უჭერს მათ მხარს. ჩვენთვის განსაკუთრებით მნიშვნელოვანია მათი ჩართულობა სამშვიდობო პროცესებში, რადგან სწორედ ახალგაზრდებმა აფხაზეთიდან უნდა შეასრულონ გადამწყვეტი როლი ქართველი და აფხაზი ხალხის დაახლოების პროცესში“, - განაცხადა ჯინჭარაძემ.
ღონისძიების ბოლოს გიორგი ჯინჭარაძე დევნილი ახალგაზრდების მონაწილეობით დადგმულ თეატრალურ წარმოდგენასაც დაესწრო.
რვადღიანი საბანაკე პროგრამა მოიცავდა მრავალფეროვან საგანმანათლებლო, სპორტულ და შემეცნებით აქტივობებსა და ტრენინგებს, რომლებიც მიზნად ისახავდა მოზარდებში სხვადასხვა უნარ-ჩვევების განვითარებას.
საზაფხულო ბანაკი აფხაზეთის დროებით ოკუპირებულ ტერიტორიაზე არსებული სკოლების მხარდაჭერის პროგრამის ფარგლებში გაიმართა, რომელიც 2022 წლიდან მასწავლებელთა პროფესიული განვითარების ეროვნული ცენტრისა და აფხაზეთის ავტონომიური რესპუბლიკის განათლებისა და კულტურის სამინისტროს მიერ ხორციელდება. მასში ყოველწლიურად 9-დან 16 წლამდე 200-მდე მოსწავლეა ჩართული.
1992 წლის 14 აგვისტოს აფხაზეთში განვითარებულ ტრაგიკულ მოვლენებთან დაკავშირებით აფხაზეთის ავტონომიური რესპუბლიკის მთავრობის თავმჯდომარემ გიორგი ჯინჭარაძემ, აფხაზეთის ავტონომიური რესპუბლიკის უმაღლესი საბჭოს თავმჯდომარე ჯემალ გამახარიასთან ერთად საქართველოს ტერიტორიული მთლიანობისთვის დაღუპულ გმირთა მემორიალი გვირგვინით შეამკო და მათ ხსოვნას პატივი მიაგო.
"14 აგვისტო საქართველოს უახლეს ისტორიაში უმძიმესი და ტრაგიკული დღეა. მინდა პატივი მივაგო ჩვენს გმირებს, თავდადებულ მებრძოლებს, ყველა იმ ადამიანს, ვინც ჩვენი ქვეყნის გამო, ჩვენი სამშობლოს თავისუფლებისთვის თავი გაწირა და სიცოცხლე მიუძღვნა ჩვენს ქვეყანას.
მე დარწმუნებული ვარ, რომ საქართველოს მთავრობის პრაგმატული, თანმიმდევრული, სამშვიდობო პოლიტიკით ჩვენ აუცილებლად შევძლებთ ერთიან საქართველოში ცხოვრებას აფხაზ დებთან და ძმებთან ერთად“, - განაცხადა გიორგი ჯინჭარაძემ.
საქართველოს ტერიტორიული მთლიანობისთვის დაღუპულ გმირთა მემორიალთან ასევე საქართველოს თავდაცვის მინისტრის მოადგილე გრიგოლ გიორგაძე, თავდაცვის ძალების მეთაურის მოადგილე გენერალური შტაბის უფროსი, გენერალ-მაიორი ჯონი ტატუნაშვილი, აფხაზეთის მთავრობის წევრები, უმაღლესი საბჭოს დეპუტატები, აფხაზეთის ომის ვეტერანები და დაღუპულთა ოჯახის წევრები იმყოფებოდნენ.
აფხაზეთში შეიარაღებული დაპირისპირება 1992 წლის 14 აგვისტოს დაიწყო. პირველი შეტაკებები ოჩამჩირისა და გულრიფშის რაიონებში მოხდა. სამხედრო დაპირისპირება 403 დღე გაგრძელდა, რასაც ათასობით მშვიდობიანი მოქალაქე და ჯარისკაცი შეეწირა.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, განათლებისა და კულტურის მინისტრ ბექა ღვაჩლიანთან ერთად, ქუთაისში მდებარე აფხაზეთის საჯარო სკოლებს ეწვია და პედაგოგებს შეხვდა.
მთავრობის თავმჯდომარე ზოგადსაგანმანათლებლო დაწესებულებების ინფრასტრუქტურას გაეცნო.
მასწავლებლებთან შეხვედრისას განათლების სფეროში არსებულ გამოწვევებსა და სამომავლოდ განსახორციელებელ პროექტებზე ისაუბრა.
შეხვედრებს აფხაზეთის №5 საჯარო სკოლის დირექტორი ნათია თევდორაძე და №6 საჯარო სკოლის დირექტორი ნონა წოწორია ესწრებოდნენ.
მთავრობის თავმჯდომარე აფხაზეთის საჯარო სკოლების საჭიროებებს მთელი ქვეყნის მასშტაბით ეტაპობრივად ეცნობა.
