თანამშრომლობის მემორანდუმს ხელი მოაწერეს აფხაზეთის ავტონომიური რესპუბლიკის განათლებისა და კულტურის  მინისტრმა ეკა ხოფერიამ და გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის ეროვნული კვლევითი ცენტრის დირექტორმა  თამარ ბელაშვილმა.

მემორანდუმის მიზანია ცოდნისა და გამოცდილების გაცვლა საკუთარი კომპეტენციის ფარგლებში (ხელოვნების ისტორია, არქიტექტურა, რესტავრაცია, თანამედროვე ციფრული ტექნოლოგიები, ფოტოგრაფია, არქივმცოდნეობა, კულტურული მემკვიდრეობის პოპულარიზაცია, ბეჭდური პროდუქციის შექმნა და სხვა).

გარდა ამისა, ისინი ერთად გაუწევენ ორგანიზებას სამეცნიერო პროექტებს (კონფერენციებს, სემინარებს, სეზონურ სკოლებს და სხვ.) და შედეგებს სამეცნიერო სტატიების, კრებულების, ბუკლეტებისა თუ წიგნების სახით გამოაქვეყნებენ. საჭიროების შემთხვევაში აწარმოებენ ერთობლივ კვლევებს და ა. შ.

აფხაზეთის ავტონომიური რესპუბლიკის განათლებისა და კულტურის მინისტრი ეკა ხოფერია საქართველოს პარლამენტის ეროვნულ ბიბლიოთეკაში აფხაზეთის წარმატებულ ახალგაზრდებს შეხვდა და თანამშრომლობის საკითხებზე ესაუბრა. შეხვედრას ესწრებოდნენ სახელმწიფო უწყებებში, კერძო კომპანიებსა თუ საერთაშორისო ორგანიზაციებში დასაქმებული წარმატებული ახალგაზრდები.

მინისტრმა ყურადღება აფხაზეთის საჯარო სკოლების აღსაზრდელებზე შეაჩერა და სტუმრებს მიმართა: „გვინდა, აფხაზეთის წარმატებულმა ახალგაზრდებმა, საკუთარი გამოცდილების გათვალისწინებით, გაგვიზიაროთ რჩევები, წინადადებები, როგორ, რა გზით ვიაროთ, რომ ამ სკოლების ბავშვებს დანარჩენ საზოგადოებასთან ინტეგრირებასა და წარმატების მისაღწევად საჭირო უნარ-ჩვევების შეძენაში დავეხმაროთ“.

შეხვედრა დიალოგის რეჟიმში წარიმართა და იმსჯელეს მომავალი თანამშრომლობის პერსპექტივაზე. ითქვა, რომ ახალგაზრდების მხარდასაჭერად მნიშვნელოვანია მათი ჩაბმა საერთაშორისო პროექტებსა და პროგრამებში, აფხაზეთის თემატიკასთან დაკავშირებული კონფერენციებსა და ფორუმებში და ა. შ.

დასასრულ შეთანხმდენ, რომ შეიქმნას აფხაზეთის წარმატებული ახალგაზრდების სამუშაო ჯგუფი, რომელიც თავისი იდეებით, წინადადებებითა და პრაქტიკული ნაბიჯებით  შეხვედრაზე წამოჭრილი საკითხების მოგვარებას შეუწყობს ხელს.

აფხაზეთის საჯარო სკოლებში საქართველოს პირველი ეროვნული გმირის ჟიული შარტავას დაბადების დღისადმი მიძღვნილი კვირეული ჩატარდა. კვირეულის ფარგლებში სკოლებში გაიმართა ჟიული შარტავას ცხოვრებისა და მოღვაწეობის ამსახველი კონფერენციები, საუბრები, გამოფენები, დოკუმენტური ფილმის ჩვენება და დისკუსიები თემაზე:  „ჟიული და აფხაზეთი (ჟიული შარტავას როლი აფხაზეთის კონფლიქტის მოგვარებაში)“ და ა. შ.

მიწოდებული ინფორმაციების კვალდაკვალ სკოლებში ჩატარდა ესეების კონკურსი „ჟიული შარტავა - ჩვენი დროის გმირი“; მოსწავლეებმა ასევე დაწერეს თემები:  „ჟიული შარტავა - ეროვნული გმირი“;  „გმირი, რომელიც იქ იდგა და სხვაგვარად არ ძალუძდა“; „გმირის უკანასკნელი სიტყვების გააზრება: „ბოლომდე ვიბრძოლებთ, თუ სიკვდილი გვიწერია, არც ესაა დიდი ტრაგედია“ და სხვ.

კვირეულის ბოლოს თბილისში განთავსებული აფხაზეთის საჯარო სკოლების მოსწავლეებმა და პედაგოგებმა ყვავილებით შეამკეს ჟიული შარტავას საფლავი და პატივი მიაგეს მის ხსოვნას.

აფხაზეთის ავტონომიური რესპუბლიკის განათლებისა და კულტურის მინისტრმა ეკა ხოფერიამ, გაცნობის მიზნით,  ქუთაისში მდებარე აფხაზეთის მეხუთე და მეექვსე საჯარო სკოლები მოინახულა. მან სკოლის პედაგოგებს  საგაზაფხულო დღესასწაულები  - დედის დღე და ქალთა დღე მიულოცა და ფარმაცევტული კომპანია პსპ აფთიაქი-სა და დიზაინერ თეონა თავართქილაძის კომპანიის მიერ შეჩეული საჩუქრები გადასცა.

მინისტრი სკოლების ინფრასტრუქტურითა და საჭიროებებითაც დაინტერესდა და აღნიშნა, რომ არსებული პრობლემების მოგვარებაზე აფხაზეთის ა/რ განათლებისა და კულტურის სამინისტრო იზრუნებს.

ჟიული შარტავა იყო აფხაზეთის ავტონომიური რესპუბლიკის მთავრობის თავმჯდომარე, რომელიც 1993 წლის 27 სექტემბერს, სოხუმის დაცემის დღეს, თანამებრძოლებთან ერთად დახვრიტეს.

„ბოლომდე ვიბრძოლებთ, ვიდრე შეგვიძლია და თუ სიკვდილი გვიწერია, არც ეს უნდა იყოს დიდი ტრაგედია. ისეთი ბიჭები იხოცებიან, ძნელია ამის შემყურემ სიცოცხლეზე იფიქრო. რას იზამ, ძნელია, ბედისწერას გაექცე!" - უთქვამს ჟიული შარტავას. იგი თავისი სიტყვების ერთგული დარჩა, განწირული სოხუმის მოსახლეობა ბოლომდე არ მიატოვა და ამ რწმენას შეეწირა კიდეც.